85 kumpirmadong patay, 75 nawawala dahil sa hagupit ng bagyong Tino

Nilinaw ng Office of Civil Defense na 85 ang kumpirmadong nasawi at 75 pa ang nawawala sa pananalasa ng Bagyong Tino, batay sa pinakahuling datos ng ahensya, as of 6PM nitong Miyerkoles, Nobyembre 5. Sa panayam ng DZMM, sinabi ni OCD Spokesperson Junie Castillo na maingat ang ahensiya sa paglalabas ng opisyal na bilang dahil kailangang beripikado ang bawat numero.

“Dahil alam nila na nawala, inanod na, pero di pa naman nakikita, reported agad as dead. Tayo sa NDRRMC, hindi ganon,” ani Castillo. “Hangga’t ‘di pa nakikita, ‘di pa natin isasama,” dagdag niya.

Paliwanag ni Castillo, ang napa-ulat na 92 na nasawi ay mula lamang sa pinagsama-samang datos ng mga local government units. Aniya, under validation pa ang ilan sa mga nawawala. “Pagdating sa NDRRMC, mahalaga na beripikado, may pangalan, may initial na detalye para hindi nagdodoble-doble,” dagdag pa niya.

Karamihan sa mga nasawi ay dahil sa pagbaha, habang ilan ay namatay sa landslide at pagbagsak ng mga debris.

Ipinunto ni Castillo ang ilan sa mga dahilan ng trahedya — ang kulang na pagpapaliwanag ng mga babala sa panahon, ang kawalan ng paghahanda ng mga residente, at ang pagsabay ng malakas na ulan at high tide sa mga baybaying lugar.

Bagaman 900,000 katao ang inilikas bilang bahagi ng pre-emptive evacuation, inamin niyang may mga lugar pa ring hindi napaghandaan ang pag-apaw ng mga ilog. Kasabay nito, nagbabala rin ang OCD sa panibago at mas malakas na bagyo na inaasahang papasok sa Philippine Area of Responsibility sa mga susunod na araw.

“Mahalaga po na alamin natin na saan, kailan, at gaano kalakas ang bagyo. Ang ulan at hangin na tatama sa atin para mas makapaghanda po tayo sa susunod na dalawang araw.